Hrossarækt

Hrossaræktin mín er frekar smá, en með stór og göfug markmið þ.a.s. rækta viljug, getumikil en jafnframt geðgóð alhliða hross. Ég hef haft gott aðgengi að toppstóðhestum undanfarin ár og nýtt mér það til fulls.

Ég á eina 1.verðlauna hryssu og nokkrar að ég tel ættgóðar sem ég er að rækta undan, en ég hef þá trú að einn af lyklunum í búfjárrækt sé að nota langræktuð hross þar sem “sterk” gen koma sem víðast fram. Einnig tel ég að úrvalið sem ræktandi framkvæmir sé hans mikilvægasta tól þ.a.s. vera gagnrýninn á sína eigin ræktun og vera sem fljótastur að sjá villu síns vegar og setja af og/eða breyta um stefnu. Ég hef verið með fleiri hryssur í ræktun en ég ætla að setja á af folöldum því að ég hef bara haldið eftir einu hestfolaldi (Váli frá Valhöll) en selt hin þar sem ég hef lagt áherslu á að halda frekar í merfolöld til að halda fjöldanum í skefjum.

Ég kenni hrossin mín við Valhöll en það er ekki vegna tengingar við Davíð Odds heldur er það tengingin við goðafræðina og fannst mér við hæfi að hrossin hans Óðins væru frá Valhöll.

Hryssur

Um mig

Ég heiti Óðinn Örn og er fæddur og uppalin í Breiðholtinu í Reykjavík. Ég gekk fyrst í grunnskóla í Hólabrekkuskóla og Seljaskóla svo í Fjölbrautaskólann í Breiðholti og að síðustu í Landbúnaðarnám að Hólum í Hjaltadal og Landbúnaðarháskólanum á Hvanneyri.

Vinnan snýst að mestu um búfé og hef ég að aðalstarfi búfjáreftirlit í Árnes- og Rangárvallasýslu. Við það vinna 3-4 þegar mest er að gera en á öðrum tímum bara einn. Vinna við kynbótasýningar í hrossarækt tekur mest af vorinu og hef ég verið sýningarstjóri á kynbótasýningum hér á suðurlandi ásamt Pétri Halldórssyni. Á haustin eru það sauðfjárdómar. Ferðast ég vítt og breitt um suðurland í þeim störfum og hef dæmt fé allt frá Grindavík í vestri til Skaptafellsýslu í austri. Á veturna hef ég séð um reiðhallarsýningar Hrossaræktarsamtaka suðurlands í Ölfushöllinni.

Það eru forréttindi að fá að vinna við áhugamál sín og ekki eru allir svo heppnir. Ég hef nú í nokkur ár stundað hrossarækt og á þrjár hryssur sem ég hef verið að halda. Ég hef verið að feta mig inn á stóðhestahald til að skapa mér skemmtilega vinnu á sumrin. Þetta er krefjandi vinna ef vel á að vera, taka á móti hryssum og stóðhestum, hafa gott eftirlit með girðingunum, sjá um pappírsvinnu sem þessu fylgir o.fl.

Vegna áhuga á hrossarækt þá tók ég að mér árið 2004 umsjón með stóðhestinum Blæ frá Hesti fyrir vin minn Sigvalda Jónsson á Hesti í Borgarfirði. Vinnu minnar vegna þá hef ég góðan tíma yfir sumarið til að sinna umsýslu og eftirliti með stóðhestum. Það er mikil vinna í kringum þetta og eftir þetta fyrsta sumar sá ég að allt eins væri gott að reyna fyrir sér í því að starfa eingöngu við stóðhestahald yfir sumarið. Tími minn fór hvort sem er mikið til í snúninga í kringum hrossin.
Sumarið 2005 leigði ég Þorra frá Þúfu, Blæ frá Hesti, Huginn frá Haga og Aðal frá Nýjabæ, en sumarið 2006 var ég með Hróð frá Refsstöðum, Blæ frá Hesti, Þey frá Akranesi og Skrúð frá Litlalandi.